Алтынньы ый 12 күнүгэр 82№-дээх «Мичээр» уһуйааҥҥа «Хамсаныылаах хоһооннор, чабырҕахтар уонна оһуохай» иитээччилэргэ анаан эбии үөрэхтээһин уһуйааччыта, СӨ үөрэҕириитин туйгуна Захарова Анна Елисеевна маастар кылаас ыытта. Билиҥҥи кэмҥэ оҕо төрөөбүт тылынан саҥарарыгар, кэпсэтэригэр, сэһэргэһэригэр, бодоруһарыгар араас кыһалҕалары көрсөрө баар суол. Нууччалыы тыллаах, төрөөбүт тылын өйдөөбөт, саҥарбат, тыла-өһө мөлтөх, сахалыы дорҕооннору этэригэр ыарырҕатар, кыбыстар. Бу кыһалҕалары суох оҥорорго, уһуйаан иитээччилэрэ күүскэ үлэлэһэллэр, оҕоҕо сөптөөх араас туһалаах эрчиллиилэри, ньымалары таба тайанан тутталлар. Бу хас да сыллаах, сыралаах үлэ уопутуттан сырдаталлар, сыл аайы араас интэриэһинэй дьарыктары ыыталлар. Тыыныы эрчиллиилэрэ, тылы-өһү имитии, төрөөбүт тылынан ыраастык саҥарарга үөрэтии, бу барыта уһуйаантан саҕаланар, ол иһин иитээччи бэйэтэ эмиэ сахалыы тыыннаах, өбүгэтин үгэһин өрө тутар киһи буолуохтаах.Кыра оҕо үтүктэн үөрэнэр, онон иитээччи уһуйааҥҥа холобур буолар. Саҥарар саҥаны кытта дьүөрэлээн хамсаныы эти-сиини уһугуннарар, уран тылга уһуйар. Үөрдэр-көтүтэр, сүргэни көтөҕөр, иитэр-үөрэтэр.Ойуулаан дьүһүннээн көрөр дьоҕурун сайыннарар. Тыыны уһатар, тыҥаны эрчийэр. Иитээччилэр табыгастаах ньымалары туттан, оҕо саҥарар саҥатын сайыннарыахтара, төрөппүттэргэ күүс-көмө буолуохтара.